എല്ലാ നന്മയും നിറഞ്ഞുനിന്ന മഹോത്സവമായിരുന്നു വ്യാഴവട്ടത്തിലൊരിയ്ക്കൽ തിരുനാവായയിൽ നടന്നുവന്ന മഹാമാഘ മഹോത്സവം. ശ്രേഷ്‌ഠമായൊരു സാംസ്‌കാരികസംഗമം. പ്രകൃതിയെ മൊത്തം ദേവതയായിക്കണ്ട്, പുഴയെ അമ്മയായിക്കണ്ട് ഒരു പുണ്യസ്‌നാനം. വിദ്വാൻമാരും ശാസ്ത്രജ്ഞരും കലാകാരൻമാരും കായികപ്രതിഭകളും ഒത്തു ചേർന്നിരുന്ന മഹാസംഗമം. നല്ലതിനെയെല്ലാം മറന്ന്, എല്ലാം അട്ടിമറിച്ച്, ഇത് മാമാങ്കമാണെന്നും തെക്കേ ഇന്ത്യയിലെ പ്രധാന ചന്തയായിരുന്നു ഇതെന്നും അതിന്റെ നേത്യത്വം പിടിച്ചടക്കാൻ നടത്തുന്ന യുദ്ധത്തിൽ വെട്ടും കുത്തും ചാവലുമെല്ലാം സ്വാഭാവികം എന്നും നമ്മളോട് പലരും പലവിധത്തിൽ കള്ളം പറഞ്ഞു. വെറും ഇരുനൂറ്റമ്പത് വർഷംകൊണ്ട് നമ്മൾ മറന്നുപോയ ഒരു ധാർമ്മികപ്രഭാവത്തെ അന്വേഷിച്ചുപോയപ്പോൾ എഴുത്തുകാരനിലെ ജിജ്ഞാസുവിന് കിട്ടിയ വെളിച്ചങ്ങളാണ് ഈ പുസ്‌തകത്തിലുള്ളത്. ചരിത്രത്തെ ഇത്രയും രസകരമായും ലളിതമായും കഥയുടെ ഭംഗി ചേർത്ത് പറയാനാവും എന്ന് ജയരാജ് മിത്ര വീണ്ടും അത്ഭുതപ്പെടുത്തുന്ന പുസ്‌തകം.